【為何在遊盪裡在遊玩裡突然便老去】
最近我有種「我真係老了」嘅感覺⋯
但其實我一向面皮都有啲厚，
我成日都當自己仲係廿頭嘅少女。
而令我覺得自己老咗，
並唔係每年增加、就快去到3字頭嘅數字
都唔係依家飲太凍野會頭痛、通頂要幾日先復原
都唔係前排講起考A-level原來已經十年前
亦唔係法令紋愈嚟愈深，眼尾開始有細紋
亦唔係開始出席唔同朋友婚禮
更加唔係叫啲小朋友叫我做姐姐開始有啲尷尬
憑呢啲小小事打擊唔到我。
最令我覺得衝擊嘅，係我開始發現我身邊啲人老了。
放心，呢篇唔係溫情文，感歎愛得太遲⋯
「日夜做見爸爸 剛好想呻 卻霎眼看出他多了皺紋」
NO！
我係發現最近玩IG，見到識咗好多年嘅舊同學們
post嘅都係求婚、pre-wedding、婚照、大肚照、BB相⋯
今日一開IG就見到點解連續幾個post都係人哋個仔？！
以前玩IG係睇吃喝玩樂、旅行相、自拍噁心相
朋友分享嘅長文多數係旅行心得、曬曬男友的愛⋯
依家我成日睇到結婚籌備心得、大肚日記、育兒教學⋯
好恐怖！
就好似見到自己Facebook廣告全部變哂育兒秘訣一樣
感覺自己好似入咗人妻人母呢group target audience咁
明明自覺係少女，但對腳已經叉咗入中女group咁樣樣。
我真係由心有種恐懼，我明明自覺係少女（真心）
但佢哋嘅人母人妻相好似一巴巴摑落我到
我彷彿聽到佢哋恥笑我：
「仲叫自己姐姐喎！仔，叫佢姨姨啦！」
諗起細個我媽有幾個朋友未結婚，我叫佢哋姐姐
去到我青春期已經覺得唔對路，佢哋都四張都仲叫姐姐⋯
依家每次見到佢哋我都覺得尷尬，
佢哋都半百，我仲要叫姐姐嗎？（噢我好似見到我嘅將來）
嗚呀。你哋可否不要老？
見到身邊朋友活得如此「大人」，
會令我嚇然感覺到自己好老耶。
P.S 驚大家誤會，呢篇唔係催婚恨嫁恨生仔文。
我，仲，係，少，女。
IG：@hkgirlfriend
FB：港女友
Search